أهو كلام ... و الحدق يفهم

•ماما ، فين العروسه بتاعتى
• عروسة ايه
• انا قلبت الدنيا عليها
• أنهى فيهم
• اللى جبتيهالى يا ماما
• مانا جبت كتير ، أنهى فيهم
• اللى شعرها أصفر
• كلهم شعرهم أصفر ، أنهى فيهم
• اللى بتبربش بعنيها
• يييييه ما كلهم بيبربشوا بعنيهم ، أنهى فيهم
• اللى فيه فيونكات فى شعرها
• يادى النيله ، أنهى فيهم
• يا ستى ، المؤدبه الوحيده اللى فيهم
• لأ ، دى خلاص اتجوزت ، دوّر على غيرها
=========================
• الحقوا يا رجاله ، السبع طايح فى البلد
• يا نهار مش فايت ، هوه محدش عارف يمسكه؟
• دول بيقولوا انه أكل نص حمير البلد ، و ابنه بيكمل ع النص التانى
• الموضوع ده مش هايحله غير مروض أسود أمريكانى
• يا ناصح ، ماهو لو جه الأمريكانى هايروضه و يطيح فى البلد على حس السبع
• طيب نشترى بندقيه روسى من اللى بتموت السبع ده
• تمنها غالى يا مغفل
• يادى النيله ، مفيش بقى غير اننا نبعت للصين ، يا تعمل لنا سبع بالكمبيوتر ياكل السبع اللى عندنا ، يا تيجى تتصرف هيه بقى
• برضو محلتهاش يا أذكى خلق الله ، ماهم هايبرطعوا فيها برضوا
• خلاص بقى سيب السبع ياكلنا ، أهو برضو مننا و علينا

=========================
• بيجولوا الواد ابن ابو عوضين راح مصر
• ياعم اصحى بجى و فوج ، هوه راح و بس؟ ده بجى من الكبارات
• ياهووووووووووه!!
• إيوه ، ده كمان فتح مصنع للبلاستيك (الصلب) ، و خد رجاله كتير جوى من هنى
• كمنى باجول الرجاله راحوا فين؟
و بعد 10 سنين ، واحد من حبايبنا الفلاحين المتنورين قاعد بيقرأ الجريده للباقيين .....
• و قد قام السيد ابن أبو عوضين بشراء كل مصانع البلاستيك فى مصر
• يا جاه النبى ، هوه بجى غنى كده
• اسكت ياوله ... كمل يا متنور
• أكمل ايه بس يا رجاله ، ده خللى طن البلاستيك بتسع تلاف جنيه
• يا داهيه دجّى

تأليف أحمد عاطف

احذروا التقليد عند القراءة

» كلام جميل!!